الجمعة , 15 نوفمبر 2019 - 7:46 مساءً
رئيس التحرير محمد السيد
المشرف العام حسن ثابت هويدى
مستشار التحرير د.صباح الحكيم
كوكب عماره

كوكب عماره تكتب : (كلام بتقوله ماتعرفش أصله )

أخبار النهاردة- بقلم/ كوكب عماره

*أسمع ياسيدي هناك العديد من الكلمات المصرية إللي بتقولها بالعامية يرجع اصلها للمصريين القدماء تخيل ………….. أحنا عرفنا من قبل أنواع الكتابة المصرية القديمة ومنها الهيروغليفية لو تفتكروا كانت عبارة عن صور مستوحاه من الطبيعه منها ما يعطي صوت واحد ومنها صور تعطي أكتر من صوت المهم تطورت الكتابة إلي أن أصبح هناك اللغه القبطية والكتابة القبطية كتبت بحروف إغريقية يونانية لكن تنطق باللغه المصرية عارف ياسيدي كده زي لغه الفرانكو بتكتب حروف إنجليزية لكن تنطق عربي
( ezyk 3amel eh )
هتقولي تمام الحمد الله المهم الكتابة القبطية أواللغه المصرية القديمة يعتقد البعض أنها لغة الكنائس حاليا لأن طبعا أحنا عارفين أن مصر قبل ما تبقي إسلامية كانت مسيحية وحتي كلمه قبطي تعني مصري ولكن لما دخل العرب مصر ووجدوا أهلها مسيحيون أصبحت تأتي في ذهنهم أن كلمة قبطي تعني مسيحي لكن هي في الأساس مصري المهم عشان ماطولشي تعالي نشوف الكلمات إللي بنستخدمها أصلها مصري وكانت بتستخدامها أمهاتنا معانا في أيام الطفولة ومنها
(مم ياواد ) الأصل موم ومعناها كل أو تناول الطعام
(أمبو ميه يلا أمبو)الأصل أمبمو ومعناها أشرب
(تاتا خطي العتبة تاتا شوية شوية ) كلمه تاتا معناها أمشي
(كده كخ ) كلمة كخ تعني قذارة
(هاجيبلك البعبع )أصلها بوبو وهو العفريت كان يتعامل معه المصريون القدماء في السحر وكذلك (كلمة بخ) تعني عفريت في اللغه المصرية القديمة
طب لما تكبر شوية ماما تعلمك وتقولك لما حد يخبط علي الباب ما تفتحشي علي طول قول (مين )إللي بيخبط كلمة هيروغليفية تعني شخص مجهول ……طب لما تفتح الباب وتلاقي قطه تقولها ايه….. (بس )أهي ديى كمان في اللغه المصرية القديمة حيث يطلق علي القط( بس )طب لما تعمل حاجه غلط مامتك تقولك جاتك( أوا )أهي كلمة أوا معناها الويل والحسرة ……وأحنا أطفال كنا بنغني يامطره (رخي رخي )رخي معناها ينزل
ويا سلام بقا لما تبقي جعان وتنزل علي الأكل (حاتتك باتتك) كلمة حاتتك أصلها حات وتعني اللحم وباتتك أصلها بات وتعني العظم يعني حاتتك باتتك معناها أنه نزل علي الأكل ولم يفرق بين اللحم والعظم من كتر الاكل وحتي كمان الكبابجي يسمي الحاتي وده بقي لو رحلت له تطلب أكل أنت وواحد صاحبك وقسمت الأكل ما بينكم و أخد صاحبك كفته زيادة تقوله أيه (انت هتحمرأ) كلمة مصرية قديمة تطلق علي الشخص الذي يتراجع عن عهوده طب لو أهبل وزايط فيها ومقضيها أكل تقوله ايه انت ياض( هتكوش) علي الأكل كله …..يكوش تطلق علي الطماع……… أنت باين عقلك( تراللي) تطلق علي الشخص خفيف العقل وممكن كمان تشتمه وتقوله أنت ياض (بقف) وكانت تقال عند التحقير بشخص وتعني جلد النعجه ولما تتخنق منه بقي تقوله ياأخي( جاي )منك. …..وتقال حين يصرخ الشخص ليتم إنقاذه وتعني ألحقوني ………
وأستكمال للحوار صاحبك مقضيها أكل تقوله أيه خليك أنت كده (هايص وأنا لايص) أهي كلمة لايص ديه تعني الطين وتعني الكلمه أن أحوال الشخص مطينه .
لا كمان ممكن تقوله ياأخي أنا كنت كلت فول (مدمس) أصلها متمس وتعني المدفون …….. ولا(بيصاره )أصلها بيصورو وتعني الفول المطبوخ ….ولا أني أكل معاك
طب لو صاحبك التراللي ده مات هتدعيله وتقول ربنا (يبشبش الطوبه )إللي تحت رأسه. …..تعني الطوب بعد صب الماء عليه ليكون ليناً 😂أتمني تكونوا أستفادتوا #آه_والله🤚
شاركها:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *