الخميس , 27 فبراير 2020 - 3:48 صباحًا
رئيس التحرير محمد السيد
المشرف العام حسن ثابت هويدى
مستشار التحرير د.صباح الحكيم
منى بدره

منى بدره تكتب – على حسب انت واقف فين!!

 أخبار النهاردة- بقلم – منى بدره
انت متحدد على حسب وقفتك…واقف فين.. وباصص على فين.. محجم نفسك اذا باصص لورا.. للي حصل.. واللي كان ممكن يحصل.. اذا باصص لكمية الوجع اللي مريت بيه.. ولا الوقعات والخبطات اللي عدت عليك.. اذا متحسر على اللي فات.. ولا شاغل نفسك بإنك كان ممكن متمرش باللي مريت بيه.. اذا مبتفكرش غير في العلاقة الغلط اللي دخلت فيها… وحتى اذا باصص للحظات الحلوة اللي راحت واختفت.. للاصحاب اللي مبقوش موجودين.. للشغل اللي كنت مرتاح فيه وسبته… للايام الحلوة اللي عدت عليك… بصتك للي فات ووقفتك عند مشهد معين مش حترجعه ولا حتغيره.. مش حتعوضك.. مش حتريحك!! المشاهد اللي عدت عدت.. عدت عشان سبب.. والسبب اختفى.. راح ومش حيرجع.. يمكن لسة سايب أثر.. وأثره في انك تتعلم منه.. مش في انك تقف عنده وتخليه محور حياتك.. أثره في انك متعديش بيه تاني!! أثره في انك تردمه وتبني عليه على نظيف!! بس اذا فضلت عايش في فيلم قديم.. احداثه وديكوراته وممثلينه قدام.. حيفشل!! مين يقدر يفضل قديم في كل لحظة الكون كله بيتطور فيها…مش حتعرف تعيش لحظتك… فرصة اليوم الجديد اللي ربنا اداهولك حتضيع… فرصة انك تعيش بمعناها الحقيقي بتروح!!
واذا انت باصص على قدام اوي.. شاغل نفسك باللي حيحصل.. وحيحصل امتى.. باصص بس على بعد سنة او سنتين او ٥ سنين.. بتشتغل بس عشان الاولاد لما تكبر…بتقوم وتنام وتاكل عشان بس تأمن مستقبلك… قلقان وتعبان ومحتار عشان قدام..بتفكر في اللي حيموت ومش حيبقى معاك… خايف لحسن ميحصلش.. وخايف من اللي ممكن يحصل وانت مش عاوزه يحصل.. عايش وقت مش بتاعك.. ممكن متعشهوش.. وممكن تحصل حاجات تانية انت متعرفهاش..
مهتم اوي بالنتيجة.. ومهمل وقت المذاكرة.. مهمل تركز في الدروس..مهمل اللي بيذاكروا معاك… مهمل وظيفتك الاساسية انك تتعلم وتطبق مش انك تنجح…..النجاح نتيجة.. بس عشان تنجح لازم تذاكر وتجتهد... مهم اوي نتعلم من الماضي.. مهم اوي نخطط للمستقبل.. بس كتر التمسك والتفكير في الماضي.. بيكلبشك فيه.. وكتر القلق والخوف على المستقبل بيسحب كل طاقتك وحيوتك.. عيش لحظتك.. واستمتع باللي وصلتله .. لإنك انت دلوقتي بهيئتك وشخصيتك بسبب ماضيك.. عيش لحظتك.. وخطط لمستقبلك باللي نفسك فيه..
بس متخلهوش يوترك ويقلقك.. خليه هدف.. مش اسلوب حياة..اللحظة اللي انت عايشها اهم.. اللحظة اللي انت فيها اوقع .. اللحظة اللي انت فيها هى اللي بتمتلكها.. هى اللي بتقدر تغيرها.. هى اللي في ايدك.. هى اللي مطلوب منك تركز فيها.. هى اللي حتتحاسب عليها!!!

 

شاركها:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *