الخميس , 27 فبراير 2020 - 4:03 صباحًا
رئيس التحرير محمد السيد
المشرف العام حسن ثابت هويدى
مستشار التحرير د.صباح الحكيم
منى بدره

منى بدره تكتب – رحلة رقم ٩٠٣ !!

 أخبار النهاردة- بقلم – منى بدره

وانت في رحلة سفرك المتحددة انها حتاخد ١٢ ساعة.. عندك ترانزيت في بلدين!!

قبل الوقفة الاولى.. معاك مجموعة من الركاب.. المختلفين..حتلاقي اللي نايم.. واللي بيقرأ.. اللي بيرغي مع غيره.. واللي واخد جمب.. واللي بيتفرج عالتليفزيون… وحتلاقي اللي متحمس انه يوصل… واللي قلقان طول الرحلة.. واللي متضايق ومش عاجبه اي حاجة..لا الخدمة ولا طاقم الرحلة..

وصلتوا مكان الترانزيت.. فيه اللي دي كانت وجهته.. اللي حيستقر فيها..خلصت رحلته!!! وفيه اللي طالع معاك تاني.. وفيه اللي حييجي جديد معاكم في الرحلة للترانزيت اللي بعده!!

ومن مكان الترانزيت الاول للمكان التاني.. مجموعة مختلفة تانية من الركاب!!! وأحداث ومواقف مختلفة برده!! لحد معاد وصول الرحلة!! وفيه اللي رحتله كانت امبارح.. واللي رحلته لسة حتكون بكره!!! في الآخر..كل واحد وليه رحلة..

ينفع تقول لحد اوعى تقرا.. نام ومتتفرجش عالتليفزيون.. ارغي مع ده وسيب ده؟!! ينفع تيجي تقول لحد ليه نازل ترانزيت في المكان الفلاني؟ ينفع وانتو طايرين بالطيارة تخلي حد يغير وجهته؟ ينفع الراكب اللي جمبك تخليه يقوم ويقعد في حتة تانية؟ ينفع اللي حييجي جديد يركب معاكم بعد الترانزيت تقوله انا مش حابب ان انت اللي تكمل معايا باقي الرحلة؟ طب ينفع تعترض على المطبات الهوائية؟ ينفع تقول انا مش مكمل نزلوني دلوقتي؟

 

هى كده!! احنا في رحلة.. كل واحد كان ليه وقت اقلاع.. وكل واحد ليه معاد وصول!! متجيش تعترض على افعال حد.. ولا تعترض على مسار حد.. اختار يقضي رحلته بطريقته..واختار يقف ترانزيت في مكان مختلف عنك.. مينفعش تتدخل او تحكم.. هو ليه رحلته الخاصة!!

مينفعش تقول لحد اتحط في طريقك.. من اهل لزمايل في الشغل… لقرايب لنسايب.. اخرجوا من حياتي!! مينفعش تقول لأي ابتلاء او محنة بتعدي بيها متجيش… وروحوا لحد تاني.. دول جزء من رحلتك!! الحياة كوكتيل من كل ده.. كوكتيل من الناس اللي بنقابلها.. اللي معانا طول الرحلة.. واللي حيختفي في النص.. واللي حيدخل علينا جديد…لازم نتعامل معاهم…لازم نقبلهم…لازم نتعاون مع بعض عشان رحلتنا تخلص بأمان وسلام..

مش من مصلحتنا نحكم على بعض.. او نعادي بعض… بالعكس… مطلوب مننا نتعلم ازاي نتكيف مع بعض.. حتى اذا كنا مختلفين عن بعض.. حتى اذا كانت وجهتنا مختلفة..

الحياة كوكتيل من المواقف.. الحلوة والصعبة.. زي ما بتفرح بالحلو.. محتاج تقبل الصعب.. وتتعلم ازاي تخطيه!! الاعتراض والتمرد على المطبات بيخل من توازن الطيارة… بيغلوش عالرحلة.. بيخلي كل المشاعر السلبية من ضيق وقلق وخوف يسيطروا عليك..

ولما تقرب من نهاية الرحلة.. وتفهم انك كان لازم تستمتع بكل لحظة في رحلتك.. حتى اللحظات الصعبة…حيكون فات الأوان.. ولما تقرب من نهاية الرحلة حتكتشحف ان طول الرحلة.. بمطباتها..و بناسها كانوا رزق كبير ليك.. كان لازم تستغله.. كان لازم تتأكد ان كل حاجة حصلت في رحلتك كان ليها معنى مهم ليك في رحلتك.. بس انت كنت مشغول بمساوئ الرحلة.. او مشغول بمعاد الوصول!!!

شاركها:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *