الخميس , 27 فبراير 2020 - 3:05 صباحًا
رئيس التحرير محمد السيد
المشرف العام حسن ثابت هويدى
مستشار التحرير د.صباح الحكيم
منى بدره

خد شيكولاتة واسكت !! بقلم – منى بدره

 أخبار النهاردة- بقلم – منى بدره
الإستسهال!!
خد يا حبيبي الشيكولاتة واسكت!!
اتعودنا ناخد اي حاجة حلوة بسرعة تنسينا اللي بنواجهه.. اتعودنا عالنفس القصير.. اتعودنا عالجاهز.. عاوزين النتيجة من قبل ما نعمل أي مجهود او أقل مجهود…
اتعودنا اننا نستسهل… اتعودنا عالمسكنات!! لما بنتعب بنجري عالمسكنات!!مش مهم العلاج… المهم بنحسش بالألم!!!
معندناش استعداد نشغل جهاز المناعة طبيعي.. معندناش استعداد نستحمل التعب… معندناش استعداد نجرب الدوا اللي علاجه اكيد بس محتاج صبر ووقت!
كل ما نتعرض لنصيحة.. او أداة جديدة لحل مشاكلنا..
كل ما يتعرض علينا فكر جديد او طريقة جديدة لمواجهة مخاوفنا وقلقنا.. وسيلة نتغير بيها…نقول اصل ده صعب!! اصل انت مش في مكاني ومش حاسس بيا!! اصل الكلام سهل بس التنفيذ صعب!!
كل ده صح… بس مين قال اننا مخلوقين عشان نعيش الحياة السهلة… مين قال ان النجاح مش محتاج لمجهود… مين قال ان التغيير والتطوير مش بياخد وقت!! ليه دايما بنستسهل…
اومال ربنا قال لمين (وَفِي ذَٰلِكَ فَلْيَتَنَافَسِ الْمُتَنَافِسُونَ)
حيحصل ازاي التنافس طول ما بنستسهل!! حيحصل ازاي التفضيل ما بين اللي بيسعى وبيشتغل وبيجتهد واللي مضيع وقته!!
ازاي حيكون فيه فرق ما بين اللي بيحاول وبيجاهد نفسه وما بين اللي متكل على غيره او مستني معجزة من بره تغيره وتحركه!!!
الصعوبة سنة من سنن التغيير… عشان تغير صفة.. او تكتسب مهارة… عشان تداوي جرح او تدخل عادة جديدة.. لازم حتواجه صعوبة!! والحاجة السهلة مش هى اللي حتميزنا!!
عمرك شفت حد ناجح او متميز.. نجح في اسهل حاجة او مشي في أسهل الطرق؟!!
ليه بتستصعب انك تحاول!!
شاركها:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *