الأحد , 29 مارس 2020 - 2:13 صباحًا
رئيس التحرير محمد السيد
المشرف العام حسن ثابت هويدى
مستشار التحرير د.صباح الحكيم
منى بدره

انهي باب حيتفتح!! بقلم – منى بدره

أخبار النهاردة- بقلم – منى بدره
عن كمية الخبطات والوقعات والصدمات اللي ممكن تعدي بالواحد مش في حياته ككل.. لا في يومه بتفاصيله!! والحقيقة اننا اتعودنا على ان الحل مع اول مشكلة تواجهنا اننا نشتكي.. ونلوم ونعاتب.. نعيط ونحزن ونستنى يا اما حد يغيرلنا الواقع.. يا اما معجزة من السما تنزل تغيرهولنا..
متعودناش عالبدايل!!! دماغنا اتركبت ان اول ما أقول آه اشتكي.. او ارمي المسئولية على غيري.. او اقفل على نفسي واغني ظلموه!! البدايل مفتاح سحري.. حط بديل لكل حاجة… اذا كنت مخطط لحاجة في يومك وجه ظرف غيرلك كل الخطة اوجد بديل! اذا محتاج احساس الحب واهتمام ومش لاقيه من الشخص القريب منك.. اوجد بديل.. دور وحتلاقي اللي يديلك نفس الحب.. متربسش دماغك على حد معين!!
اذا شغلك ماشي بطريقة مش عاجباك.. اوجد بديل… غير من طريقة عرضك لشغلك.. غير من طريقة معاملتك.. حتلاقي نتيجة مختلفة!! اذا ابنك مش راضي يسمع كلامك..اوجد بديل.. دور على اسلوب اقناع مختلف.. دور على الطريقة اللي تدخل بيها قلبه.. حتلاقي نتيجة مختلفة!! اذا دايرة اصحابك مش بتديك الدعم الكافي عشان توصل لهدفك.. اوجد بديل..
حتلاقي ناس تانية بنفس اهدافك وخططك.. متسبش دول عشان دول.. ولكن اتقرب اكتر للي حيدعمك.. حتلاقي نتيجة مختلفة!! اذا كان نفسك تحقق هدف ليك ومش عارف.. اوجد بديل… هدفك ممكن يتحقق كل ما غيرت بس طريقة سعيك!! ربنا هيأ لينا طرق كتير.. وأوجد حوالينا ناس كتير ومختلفة!! ليه متربسين دماغنا على طريق واحد.. ليه مصممين على اشخاص معينة هما اللي يساعدونا ويدعمونا!! اسعى..
وخبط على كل الابواب.. المتعة مش في الباب اللي حيتفتح.. المتعة في التخبيط نفسه.. المتعة في التدوير.. المتعة في الشعور باللهفة في انهي باب حيتفتح.. انهي بديل حينفع.. انا حعرف امشي في انهي طريق.. مين يا ترى اللي حينفع يساعدني.. متحبطش مع اول وقعة!! متغيرش هدفك عشان محققتش مرادك من اول مرة… غير طريقة سعيك.. غير طريقة تفكيرك.. غير المصدر اللي معتمد عليه.. غير الطريقة اللي بتتعامل بيها… غير السكة اللي ماشي فيها.. لكن اتمسك دايما بهدفك ونيتك!!!
شاركها:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *